ಮಾನವನ ದೇಹದಲ್ಲಿ ರಕ್ತವನ್ನು ಶುದ್ಧೀಕರಿಸಿ ವಿಷಕಾರಿ ತ್ಯಾಜ್ಯಗಳನ್ನು ಹೊರಹಾಕುವ ಮೂತ್ರಪಿಂಡಗಳ (Kidney) ಆರೋಗ್ಯದ ಬಗ್ಗೆ ಜನರಲ್ಲಿ ಜಾಗೃತಿ ಅಗತ್ಯವಾಗಿದೆ. ಬಹುತೇಕ ಸಂದರ್ಭಗಳಲ್ಲಿ ಕಿಡ್ನಿ ಸಮಸ್ಯೆಗಳು(Kidney Disease) ಆರಂಭಿಕ ಹಂತದಲ್ಲಿ ಯಾವುದೇ ಸ್ಪಷ್ಟ ನೋವು ಅಥವಾ ಮುನ್ಸೂಚನೆಗಳನ್ನು ನೀಡುವುದಿಲ್ಲ. ಕಾಯಿಲೆ ಉಲ್ಬಣಿಸಿದ ನಂತರವೇ ಬೆಳಕಿಗೆ ಬರುವುದರಿಂದ ಇದನ್ನು ‘ಸೈಲೆಂಟ್ ಕಿಲ್ಲರ್’ ಎನ್ನಲಾಗಿದ್ದು, ಈ ಕುರಿತು ಕೆನಡಿಯನ್ ಸೊಸೈಟಿ ಆಫ್ ನೆಫ್ರಾಲಜಿಯ ನಿಯೋಜಿತ ಅಧ್ಯಕ್ಷ ಹಾಗೂ ಖ್ಯಾತ ಮೂತ್ರಪಿಂಡ(Kidney) ತಜ್ಞ ಡಾ. ಸಂಜಯ್ ಪಾಂಡೆಯಾ ಮಹತ್ವದ ಮಾಹಿತಿ ಮತ್ತು ಮುನ್ನೆಚ್ಚರಿಕೆಗಳನ್ನು ಹಂಚಿಕೊಂಡಿದ್ದಾರೆ.
ಶೇ. 80-90 ರಷ್ಟು ಹಾನಿಯಾದ ಮೇಲಷ್ಟೇ ಲಕ್ಷಣ ಗೋಚರ
ಮೂತ್ರಪಿಂಡಗಳು ಶೇಕಡಾ 80 ರಿಂದ 90 ರಷ್ಟು ಹಾನಿಗೊಳಗಾಗುವವರೆಗೂ ವ್ಯಕ್ತಿಗೆ ಯಾವುದೇ ತೀವ್ರ ತೊಂದರೆಗಳು ಕಾಣಿಸಿಕೊಳ್ಳದಿರಬಹುದು. ಕಾಯಿಲೆ ಗಂಭೀರ ಹಂತ ತಲುಪಿದ ಬಳಿಕವಷ್ಟೇ ವಿಪರೀತ ಆಯಾಸ, ಪಾದಗಳು ಮತ್ತು ಕಣಕಾಲುಗಳಲ್ಲಿ ಊತ, ಉಸಿರಾಟದಲ್ಲಿ ತೊಂದರೆ, ವಾಕರಿಕೆ, ವಾಂತಿ ಹಾಗೂ ಚರ್ಮದಲ್ಲಿ ಬಿಡದೆ ಕಾಡುವ ತುರಿಕೆಯಂತಹ ಲಕ್ಷಣಗಳು ತಲೆದೋರುತ್ತವೆ. ಆದ್ದರಿಂದ ದೇಹ ನೀಡುವ ಇಂತಹ ಸೂಕ್ಷ್ಮ ಬದಲಾವಣೆಗಳನ್ನು ಕಡೆಗಣಿಸದೆ ತಕ್ಷಣವೇ ವೈದ್ಯಕೀಯ ಪರೀಕ್ಷೆಗೆ ಒಳಗಾಗುವುದು ಅಗತ್ಯ.
ರಕ್ತ ಮತ್ತು ಮೂತ್ರದ ನಿಯಮಿತ ಪರೀಕ್ಷೆ ಅನಿವಾರ್ಯ
ಕಿಡ್ನಿಗಳ ಶೋಧನಾ ಸಾಮರ್ಥ್ಯ ಸರಿಯಾಗಿದೆಯೇ ಎಂಬುದನ್ನು ತಿಳಿಯಲು ವರ್ಷಕ್ಕೊಮ್ಮೆಯಾದರೂ ರಕ್ತದಲ್ಲಿನ ಸೀರಮ್ ಕ್ರಿಯೇಟಿನೈನ್ ಮತ್ತು ಜಿಎಫ್‌ಆರ್ (ಗ್ಲೋಮೆರುಲರ್ ಫಿಲ್ಟ್ರೇಶನ್ ರೇಟ್) ತಪಾಸಣೆ ಮಾಡಿಸಿಕೊಳ್ಳಬೇಕು. ಇದರೊಂದಿಗೆ ಮೂತ್ರದಲ್ಲಿನ ಅಲ್ಬುಮಿನ್-ಕ್ರಿಯೇಟಿನೈನ್ ಅನುಪಾತ (ACR) ಪರೀಕ್ಷೆ ಮಾಡಿಸುವುದರಿಂದ ಪ್ರೋಟೀನ್ ಸೋರಿಕೆ ಆಗುತ್ತಿದೆಯೇ ಎಂಬುದು ಸ್ಪಷ್ಟವಾಗುತ್ತದೆ. ಮೂತ್ರದಲ್ಲಿ ಪ್ರೋಟೀನ್ ಅಂಶ ಪತ್ತೆಯಾದರೆ ಕಿಡ್ನಿಗಳು ಒತ್ತಡದಲ್ಲಿವೆ ಅಥವಾ ಹಾನಿಗೊಳಗಾಗುತ್ತಿವೆ ಎಂಬುದನ್ನು ಆರಂಭದಲ್ಲೇ ಗುರುತಿಸಬಹುದು.
ಕಿಡ್ನಿ ವೈಫಲ್ಯ ತಪ್ಪಿಸಲು ತಜ್ಞರು ಸೂಚಿಸಿದ 4 ರಕ್ಷಣಾ ಮಾರ್ಗಗಳು
ಮಧುಮೇಹ (ಸಕ್ಕರೆ ಕಾಯಿಲೆ) ಮತ್ತು ಅಧಿಕ ರಕ್ತದೊತ್ತಡವನ್ನು (ಬಿಪಿ) ಕಟ್ಟುನಿಟ್ಟಾಗಿ ನಿಯಂತ್ರಣದಲ್ಲಿಟ್ಟುಕೊಳ್ಳುವುದು ಮೊದಲ ಮಾರ್ಗವಾಗಿದೆ. ಹೆಚ್ಚಿನ ಕಿಡ್ನಿ ವೈಫಲ್ಯ ಪ್ರಕರಣಗಳಿಗೆ ಈ ಎರಡು ಕಾಯಿಲೆಗಳೇ ನೇರ ಕಾರಣವಾಗಿರುತ್ತವೆ. ಎರಡನೆಯದಾಗಿ, ದಿನನಿತ್ಯ ನಿಯಮಿತ ವ್ಯಾಯಾಮದೊಂದಿಗೆ ತೂಕವನ್ನು ಹತೋಟಿಯಲ್ಲಿಟ್ಟುಕೊಂಡು ಸಮತೋಲಿತ ಜೀವನಶೈಲಿಯನ್ನು ಕಾಪಾಡಿಕೊಳ್ಳಬೇಕು. ಮೂರನೆಯದಾಗಿ, ಊಟದಲ್ಲಿ ಉಪ್ಪಿನ (ಸೋಡಿಯಂ) ಪ್ರಮಾಣವನ್ನು ಕಡಿಮೆ ಮಾಡುವುದು ಹಾಗೂ ಮದ್ಯಪಾನ ಮತ್ತು ಧೂಮಪಾನದಂತಹ ದುಶ್ಚಟಗಳಿಂದ ದೂರವಿರುವುದು ರಕ್ತನಾಳಗಳ ಹಾನಿಯನ್ನು ತಡೆಯುತ್ತದೆ. ನಾಲ್ಕನೆಯದಾಗಿ, ಸಾಮಾನ್ಯ ಮೈಕೈ ನೋವಿಗೆಲ್ಲ ವೈದ್ಯರ ಅನುಮತಿಯಿಲ್ಲದೆ ಎನ್‌ಎಸ್‌ಎಐಡಿ (NSAIDs) ಗುಂಪಿನ ನೋವು ನಿವಾರಕ ಮಾತ್ರೆಗಳನ್ನು ನಿರಂತರವಾಗಿ ಸೇವಿಸುವ ಅಭ್ಯಾಸಕ್ಕೆ ಸಂಪೂರ್ಣ ಕಡಿವಾಣ ಹಾಕಬೇಕು. ಇವು ಕಿಡ್ನಿಗೆ ನೇರವಾಗಿ ಹಾನಿಯುಂಟುಮಾಡುತ್ತವೆ.
ಡಯಾಲಿಸಿಸ್‌ಗಿಂತ ಮುನ್ನೆಚ್ಚರಿಕೆಯೇ ಮುಖ್ಯ
ಪ್ರಸ್ತುತ ವೈದ್ಯಕೀಯ ಕ್ಷೇತ್ರದಲ್ಲಿ ಡಯಾಲಿಸಿಸ್ ಹಾಗೂ ಅಂಗಾಂಗ ಕಸಿ (ಟ್ರಾನ್ಸ್‌ಪ್ಲಾಂಟೇಶನ್) ತಂತ್ರಜ್ಞಾನಗಳು ಸುಧಾರಿತವಾಗಿದ್ದರೂ, ಆ ಪರಿಸ್ಥಿತಿಗೆ ತಲುಪದಂತೆ ಮುನ್ನೆಚ್ಚರಿಕೆ ವಹಿಸುವುದೇ ಜಾಣತನವಾಗಿದೆ. ಆರಂಭಿಕ ಹಂತದಲ್ಲೇ ನಿಯಮಿತ ತಪಾಸಣೆ ಮತ್ತು ಶಿಸ್ತಿನ ಜೀವನಶೈಲಿಯನ್ನು ಅಳವಡಿಸಿಕೊಂಡರೆ ಕಿಡ್ನಿ ವೈಫಲ್ಯದ ಅಪಾಯದಿಂದ ಸಂಪೂರ್ಣವಾಗಿ ಪಾರಾಗಬಹುದು ಎಂದು ತಜ್ಞರು ಕಿವಿಮಾತು ಹೇಳಿದ್ದಾರೆ.
