ಬೆಂಗಳೂರು: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರವು (KEA) ರಾಜ್ಯದ ಸ್ನಾತಕೋತ್ತರ ವೈದ್ಯಕೀಯ (PG Medical Course) ಪ್ರವೇಶಕ್ಕೆ ಸಂಬಂಧಿಸಿದಂತೆ ಮಹತ್ವದ ಮಾಹಿತಿ ನೀಡಿದೆ. ಪ್ರಸಕ್ತ ಶೈಕ್ಷಣಿಕ ಸಾಲಿನ ಮೊದಲ ಸುತ್ತಿನ ಸೀಟು ಹಂಚಿಕೆಯ ಅಂತಿಮ ಫಲಿತಾಂಶವನ್ನು ಅಧಿಕೃತ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದ್ದು, ಸೀಟು ಪಡೆದ ವಿದ್ಯಾರ್ಥಿಗಳಿಗೆ ಮುಂದಿನ ಪ್ರವೇಶ ಪ್ರಕ್ರಿಯೆಯ ದಿನಾಂಕಗಳನ್ನು ಒಳಗೊಂಡ ಸಮಗ್ರ ವೇಳಾಪಟ್ಟಿಯನ್ನು ಬಿಡುಗಡೆ ಮಾಡಲಾಗಿದೆ.
4,388 ಸೀಟುಗಳಲ್ಲಿ 3,268 ಸೀಟು ಹಂಚಿಕೆ ಪೂರ್ಣ
ಮೊದಲ ಸುತ್ತಿನ ಕೌನ್ಸೆಲಿಂಗ್ ಪ್ರಕ್ರಿಯೆಯಲ್ಲಿ ಲಭ್ಯವಿದ್ದ ಒಟ್ಟು 4,388 ಪಿಜಿ ವೈದ್ಯಕೀಯ ಸೀಟುಗಳ ಪೈಕಿ ಮೆರಿಟ್ ಹಾಗೂ ಆದ್ಯತೆಯ ಮೇರೆಗೆ 3,268 ಸೀಟುಗಳು ಅರ್ಹ ವಿದ್ಯಾರ್ಥಿಗಳಿಗೆ ಹಂಚಿಕೆಯಾಗಿವೆ. ಈ ಕುರಿತು ಕೆಇಎ ಕಾರ್ಯನಿರ್ವಾಹಕ ನಿರ್ದೇಶಕ ಹೆಚ್. ಪ್ರಸನ್ನ ಅವರು ಅಧಿಕೃತ ಮಾಹಿತಿ ಹಂಚಿಕೊಂಡಿದ್ದಾರೆ.
ಆಯ್ಕೆ (KEA Choice Entry) ದಾಖಲಿಸಲು ನವೆಂಬರ್ 11 ಕೊನೆಯ ದಿನ
ಮೊದಲ ಸುತ್ತಿನಲ್ಲಿ ಸೀಟು ಹಂಚಿಕೆಯಾಗಿರುವ ಅಭ್ಯರ್ಥಿಗಳು ತಮ್ಮ ಮುಂದಿನ ತೀರ್ಮಾನವನ್ನು ಆನ್‌ಲೈನ್ ಮೂಲಕ ನಮೂದಿಸಲು ಅವಕಾಶ ಕಲ್ಪಿಸಲಾಗಿದೆ. ಅಭ್ಯರ್ಥಿಗಳು ನವೆಂಬರ್ 11ರ ಒಳಗಾಗಿ ಪ್ರಾಧಿಕಾರದ ವೆಬ್‌ಸೈಟ್‌ನಲ್ಲಿ ಚಾಯ್ಸ್ (Choice Entry) ದಾಖಲಿಸುವುದು ಕಡ್ಡಾಯವಾಗಿದೆ.
ಚಲನ್ ಡೌನ್‌ಲೋಡ್ ಹಾಗೂ ಶುಲ್ಕ ಪಾವತಿಗೆ ಅಂತಿಮ ಗಡುವು
ಚಾಯ್ಸ್-1 (ಸೀಟು ಕಾಯ್ದಿರಿಸುವವರು) ಮತ್ತು ಚಾಯ್ಸ್-2 (ಮುಂದಿನ ಸುತ್ತಿಗೆ ಅರ್ಹತೆ ಬಯಸಿ ಹಾಲಿ ಸೀಟು ಉಳಿಸಿಕೊಳ್ಳುವವರು) ದಾಖಲಿಸಿದ ಅಭ್ಯರ್ಥಿಗಳು ನವೆಂಬರ್ 11ರೊಳಗೆ ಬ್ಯಾಂಕ್ ಚಲನ್ ಡೌನ್‌ಲೋಡ್ ಮಾಡಿಕೊಳ್ಳಬೇಕು. ನಿಗದಿತ ಕೋರ್ಸ್ ಶುಲ್ಕವನ್ನು ನವೆಂಬರ್ 12ರೊಳಗೆ ಬ್ಯಾಂಕ್ ಮೂಲಕ ಪಾವತಿಸಲು ಕೆಇಎ ಗಡುವು ವಿಧಿಸಿದೆ.
ಮೂಲ ದಾಖಲೆಗಳ ಸಲ್ಲಿಕೆ ಹಾಗೂ ಕಾಲೇಜು ಪ್ರವೇಶ ಪ್ರಕ್ರಿಯೆ
ಚಾಯ್ಸ್-1 ಆಯ್ಕೆ ಮಾಡಿಕೊಂಡು ಶುಲ್ಕ ಪಾವತಿ ಪೂರ್ಣಗೊಳಿಸಿದ ವೈದ್ಯಕೀಯ ಅಭ್ಯರ್ಥಿಗಳು, ನವೆಂಬರ್ 13ರ ಒಳಗಾಗಿ ಬೆಂಗಳೂರಿನ ಮಲ್ಲೇಶ್ವರಂನಲ್ಲಿರುವ ಕೆಇಎ ಕಚೇರಿಗೆ ತೆರಳಿ ತಮ್ಮ ಮೂಲ ದಾಖಲೆಗಳನ್ನು (Original Documents) ಪರಿಶೀಲನೆಗೆ ಸಲ್ಲಿಸಬೇಕು. ದಾಖಲೆ ಪರಿಶೀಲನೆ ಯಶಸ್ವಿಯಾಗಿ ಪೂರ್ಣಗೊಂಡ ನಂತರ ಪ್ರವೇಶ ಪತ್ರವನ್ನು (Admission Order) ಡೌನ್‌ಲೋಡ್ ಮಾಡಿಕೊಂಡು, ನವೆಂಬರ್ 14ರೊಳಗೆ ತಮಗೆ ಹಂಚಿಕೆಯಾಗಿರುವ ಕಾಲೇಜಿಗೆ ಭೇಟಿ ನೀಡಿ ಕಡ್ಡಾಯವಾಗಿ ಪ್ರವೇಶ ವರದಿ (College Reporting) ಮಾಡಿಕೊಳ್ಳಬೇಕು.
