ವಾಷಿಂಗ್ಟನ್: ಇರಾನಿನ ಬಂದರುಗಳಿಗೆ ಪ್ರವೇಶಿಸುವ ಹಾಗೂ ಅಲ್ಲಿಂದ ಹೊರಡುವ ಸಮುದ್ರ ಸಂಚಾರದ ಮೇಲೆ ಅಮೆರಿಕ ಮತ್ತೆ ನೌಕಾ ದಿಗ್ಬಂಧನ ಹೇರಿದ್ದು, ಅದನ್ನು ಉಲ್ಲಂಘಿಸಲು ಯತ್ನಿಸಿದ ಮೂರು ವಾಣಿಜ್ಯ ಹಡಗುಗಳನ್ನು ತಡೆದಿರುವುದಾಗಿ ಯುಎಸ್ ಸೆಂಟ್ರಲ್ ಕಮಾಂಡ್ (CENTCOM) ತಿಳಿಸಿದೆ.
CENTCOM ಪ್ರಕಾರ, ದಿಗ್ಬಂಧನ ಉಲ್ಲಂಘಿಸಲು ಯತ್ನಿಸಿದ ಮೂರು ಹಡಗುಗಳಲ್ಲಿ ಒಂದನ್ನು ಮರುನಿರ್ದೇಶಿಸಲಾಗಿದ್ದು, ಮತ್ತೊಂದು ಹಡಗನ್ನು ನಿಷ್ಕ್ರಿಯಗೊಳಿಸಲಾಗಿದೆ. ಇನ್ನೊಂದು ಹಡಗಿನಲ್ಲಿ ಅಮೆರಿಕದ ಮೆರೀನ್ ಪಡೆಗಳು ಪರಿಶೀಲನೆ ನಡೆಸಿವೆ.
ಜುಲೈ 16ರಂದು ಓಮನ್ ಕೊಲ್ಲಿಯಲ್ಲಿ M/T Wen Yao ಹಡಗಿನಲ್ಲಿ ಅಮೆರಿಕದ 11ನೇ ಮೆರೀನ್ ಎಕ್ಸ್ಪಿಡಿಷನರಿ ಯುನಿಟ್ ಪರಿಶೀಲನಾ ಕಾರ್ಯಾಚರಣೆ ನಡೆಸಿದೆ ಎಂದು CENTCOM ತಿಳಿಸಿದೆ.
ಇದಕ್ಕೂ ಮುನ್ನ, M/T Belma ಹೆಸರಿನ ತೈಲ ಟ್ಯಾಂಕರ್ ಅಮೆರಿಕದ ಎಚ್ಚರಿಕೆಗಳನ್ನು ನಿರ್ಲಕ್ಷಿಸಿ ಇರಾನಿನ ಖಾರ್ಗ್ ದ್ವೀಪದತ್ತ ಸಾಗುತ್ತಿದ್ದಾಗ, ಕ್ಷಿಪಣಿ ದಾಳಿ ನಡೆಸಿ ಹಡಗನ್ನು ನಿಷ್ಕ್ರಿಯಗೊಳಿಸಲಾಗಿದೆ ಎಂದು ಹೇಳಿದೆ.
ಹಾರ್ಮುಜ್ ಜಲಸಂಧಿ ಮತ್ತು ಸುತ್ತಮುತ್ತಲಿನ ಸಮುದ್ರ ಮಾರ್ಗಗಳು ಸಾಮಾನ್ಯ ಹಡಗು ಸಂಚಾರಕ್ಕೆ ಮುಕ್ತವಾಗಿದ್ದು, ದಿಗ್ಬಂಧನ ಉಲ್ಲಂಘಿಸಲು ಯತ್ನಿಸುವ ಹಡಗುಗಳ ವಿರುದ್ಧ ಮಾತ್ರ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು CENTCOM ಸ್ಪಷ್ಟಪಡಿಸಿದೆ.
ಇದೇ ವೇಳೆ, ಹಾರ್ಮುಜ್ ಜಲಸಂಧಿಯ ಮೂಲಕ ಸಾಗುವ ಹಡಗುಗಳಿಗೆ ಬೆದರಿಕೆ ಒಡ್ಡುವ ಇರಾನಿನ ಸೇನಾ ಸಾಮರ್ಥ್ಯಗಳನ್ನು ಗುರಿಯಾಗಿಸಿಕೊಂಡು ಅಮೆರಿಕ ಎರಡು ಹಂತದ ದಾಳಿಗಳನ್ನು ನಡೆಸಿದೆ ಎಂದು CENTCOM ತಿಳಿಸಿದೆ.
