ನವದೆಹಲಿ: ಭಾರತೀಯ ವಾಯುಪಡೆಯ (Indian Air Force) 29ನೇ ಮುಖ್ಯಸ್ಥರಾಗಿ (Chief of the Air Staff) ಪ್ರಸ್ತುತ ಉಪ ಮುಖ್ಯಸ್ಥರಾಗಿರುವ (Vice Chief of the Air Staff) ಏರ್ ಮಾರ್ಷಲ್ ಅಶುತೋಷ್ ದೀಕ್ಷಿತ್ (Air Marshal Ashutosh Dixit) ಅವರನ್ನು ಕೇಂದ್ರ ಸರ್ಕಾರ ನೇಮಕ ಮಾಡಿದೆ.
ಅಕ್ಟೋಬರ್ 31, 2026ರಂದು ಸೇವೆಯಿಂದ ನಿವೃತ್ತರಾಗಲಿರುವ ಹಾಲಿ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಅಮರ್ ಪ್ರೀತ್ ಸಿಂಗ್ ಅವರಿಂದ ದೀಕ್ಷಿತ್ ಅಧಿಕಾರ ಸ್ವೀಕರಿಸಲಿದ್ದು, ಅಂದೇ ಮಧ್ಯಾಹ್ನದಿಂದ ಏರ್ ಚೀಫ್ ಮಾರ್ಷಲ್ ಹುದ್ದೆಯಾಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಇವರ ಅಧಿಕಾರಾವಧಿ ಡಿಸೆಂಬರ್ 31, 2028ರವರೆಗೆ ಇರಲಿದೆ.
ಸುದೀರ್ಘ ಸೇವೆ ಮತ್ತು ಹಾರಾಟದ ಹಿನ್ನೆಲೆ
ಏರ್ ಮಾರ್ಷಲ್ ಅಶುತೋಷ್ ದೀಕ್ಷಿತ್ ಅವರು ಡಿಸೆಂಬರ್ 6, 1986ರಂದು ಭಾರತೀಯ ವಾಯುಪಡೆಯ ಫೈಟರ್ ವಿಭಾಗಕ್ಕೆ ನಿಯೋಜನೆಗೊಂಡರು. ರಾಷ್ಟ್ರೀಯ ರಕ್ಷಣಾ ಅಕಾಡೆಮಿ (NDA), ಬಾಂಗ್ಲಾದೇಶದ ಡಿಫೆನ್ಸ್ ಸರ್ವಿಸಸ್ ಸ್ಟಾಫ್ ಕಾಲೇಜ್ (DSSC) ಹಾಗೂ ರಾಷ್ಟ್ರೀಯ ರಕ್ಷಣಾ ಕಾಲೇಜಿನ (NDC) ಹಳೆಯ ವಿದ್ಯಾರ್ಥಿಯಾಗಿರುವ ಇವರು, ಪ್ರಾಯೋಗಿಕ ಪರೀಕ್ಷಾ ಪೈಲಟ್ (Experimental Test Pilot) ಮತ್ತು ಅರ್ಹ ಫ್ಲೈಯಿಂಗ್ ಬೋಧಕರಾಗಿದ್ದಾರೆ.
ಸುಮಾರು ನಾಲ್ಕು ದಶಕಗಳ ಸುದೀರ್ಘ ವೃತ್ತಿಜೀವನದಲ್ಲಿ ಮಿರಾಜ್-2000, ಮಿಗ್ ಸರಣಿಯ ವಿಮಾನಗಳು, ಜಾಗ್ವಾರ್, ಎಲ್‌ಸಿಎ ತೇಜಸ್ ಸೇರಿದಂತೆ ವೈವಿಧ್ಯಮಯ ವಿಮಾನಗಳನ್ನು ಚಲಾಯಿಸಿದ 3,500ಕ್ಕೂ ಅಧಿಕ ಗಂಟೆಗಳ ಹಾರಾಟದ ಶ್ರೀಮಂತ ಅನುಭವ ಹೊಂದಿದ್ದಾರೆ.
ಕಾರ್ಯಾಚರಣೆ ಹಾಗೂ ಮಹತ್ವದ ಜವಾಬ್ದಾರಿಗಳು
ತಮ್ಮ ಸೇವಾ ಅವಧಿಯಲ್ಲಿ ಕಾರ್ಗಿಲ್ ಯುದ್ಧದ ‘ಆಪರೇಷನ್ ಸಫೇದ್ ಸಾಗರ್’ ಹಾಗೂ ‘ಆಪರೇಷನ್ ರಕ್ಷಕ್’ ಸೇರಿದಂತೆ ಹಲವು ಪ್ರಮುಖ ಸೇನಾ ಕಾರ್ಯಾಚರಣೆಗಳಲ್ಲಿ ದೀಕ್ಷಿತ್ ಸಕ್ರಿಯವಾಗಿ ಪಾಲ್ಗೊಂಡಿದ್ದಾರೆ. ಮಿರಾಜ್-2000 ಸ್ಕ್ವಾಡ್ರನ್ ಹಾಗೂ ಪಶ್ಚಿಮ ವಲಯದ ಮುಂಚೂಣಿ ಫೈಟರ್ ನೆಲೆಯ ಕಮಾಂಡರ್ ಆಗಿಯೂ ಕಾರ್ಯನಿರ್ವಹಿಸಿದ ಅನುಭವ ಇವರಿಗಿದೆ.
ಇದಲ್ಲದೆ ಹೆಡ್‌ಕ್ವಾರ್ಟರ್ಸ್ ಇಂಟಿಗ್ರೇಟೆಡ್ ಡಿಫೆನ್ಸ್ ಸ್ಟಾಫ್‌ನ (HQ IDS) ಚೀಫ್ ಆಫ್ ಇಂಟಿಗ್ರೇಟೆಡ್ ಡಿಫೆನ್ಸ್ ಸ್ಟಾಫ್ (CISC) ಮತ್ತು ಸೆಂಟ್ರಲ್ ಏರ್ ಕಮಾಂಡ್‌ನ ಏರ್ ಆಫೀಸರ್ ಕಮಾಂಡಿಂಗ್-ಇನ್-ಚೀಫ್ (AOC-in-C) ಸೇರಿದಂತೆ ಹಲವು ಪ್ರಮುಖ ಯುದ್ಧತಂತ್ರದ ಹುದ್ದೆಗಳನ್ನು ಯಶಸ್ವಿಯಾಗಿ ನಿರ್ವಹಿಸಿದ್ದಾರೆ.
ಆತ್ಮನಿರ್ಭರ ಭಾರತ ಮತ್ತು ಸೇವಾ ಪುರಸ್ಕಾರಗಳು
ದೇಶೀಯ ರಕ್ಷಣಾ ಉತ್ಪಾದನೆಗೆ ಬಲ ನೀಡುವ ನಿಟ್ಟಿನಲ್ಲಿ ಎಲ್‌ಸಿಎ ತೇಜಸ್ ಹಾಗೂ ಇತರೆ ಸ್ವದೇಶಿ ಯುದ್ಧವಿಮಾನ ಯೋಜನೆಗಳನ್ನು ವಾಯುಪಡೆಯಲ್ಲಿ ಅಳವಡಿಸುವ ಪ್ರಕ್ರಿಯೆಯಲ್ಲಿ ದೀಕ್ಷಿತ್ ಮಹತ್ವದ ಪಾತ್ರ ವಹಿಸಿದ್ದಾರೆ.
ಇವರ ನಾಯಕತ್ವದಲ್ಲಿ ವಾಯುಪಡೆಯಲ್ಲಿ ರಕ್ಷಣಾ ಇಲಾಖೆಯ ‘ಆತ್ಮನಿರ್ಭರ ಭಾರತ’ ಯೋಜನೆ ಮತ್ತಷ್ಟು ವೇಗ ಪಡೆಯುವ ನಿರೀಕ್ಷೆಯಿದೆ. ಅವರ ಅತ್ಯುನ್ನತ ಸೇವೆಗಾಗಿ ಪರಮ ವಿಶಿಷ್ಟ ಸೇವಾ ಪದಕ (PVSM), ಅತಿ ವಿಶಿಷ್ಟ ಸೇವಾ ಪದಕ (AVSM), ವಾಯು ಸೇನಾ ಪದಕ (VM) ಮತ್ತು ವಿಶಿಷ್ಟ ಸೇವಾ ಪದಕಗಳು (VSM) ಲಭಿಸಿವೆ
