ಆದಿತ್ಯ ರಾಜ್ ಕ್ಯಾಪಿಟಲ್ಸ್ ‘ಸೇಲ್ಸ್ ಹೆಡ್ ಸಂದೀಪ್ ಗಿರಿಧರ್’ಗೆ ಷರತ್ತು ಬದ್ಧ ಜಾಮೀನು ಮಂಜೂರು

ಬೆಂಗಳೂರು: ಭಾರಿ ಲಾಭಾಂಶದ ಆಮಿಷವೊಡ್ಡಿ ಸಾರ್ವಜನಿಕರಿಂದ ಕೋಟ್ಯಂತರ ರೂಪಾಯಿ ನಗದು ಸಂಗ್ರಹಿಸಿ ವಂಚಿಸಿದ ಆರೋಪ ಹೊತ್ತಿರುವ ‘ಆದಿತ್ಯ ರಾಜ್ ಕ್ಯಾಪಿಟಲ್ ಪ್ರೈವೇಟ್ ಲಿಮಿಟೆಡ್’ ಕಂಪನಿಯ ರಾಷ್ಟ್ರೀಯ ಮಾರಾಟ ಮುಖ್ಯಸ್ಥ ಸಂದೀಪ್ ಗಿರಿಧರ್ ಅವರಿಗೆ ಬೆಂಗಳೂರಿನ ವಿಶೇಷ ನ್ಯಾಯಾಲಯವು ಬುಧವಾರ ಷರತ್ತುಬದ್ಧ ಮಧ್ಯಂತರ ನಿರೀಕ್ಷಣಾ ಜಾಮೀನು ಮಂಜೂರು ಮಾಡಿದೆ.

ಬೆಳಗಾವಿಯಲ್ಲಿ ದಾಖಲಾಗಿದ್ದ ಬೃಹತ್ ಆರ್ಥಿಕ ವಂಚನೆ ಮೊಕದ್ದಮೆಯಲ್ಲಿ 5ನೇ ಆರೋಪಿಯಾಗಿರುವ ಇವರಿಗೆ, ಸಿಐಡಿ ಬಂಧನದಿಂದ தತ್ಕಾಲಿಕವಾಗಿ ವಿನಾಯಿತಿ ಸಿಕ್ಕಂತಾಗಿದೆ.

ತನಿಖಾ ಕಣ್ಗಾವಲಿನಲ್ಲಿ ಇಡೀ ವಹಿವಾಟು:

ಹೂಡಿಕೆದಾರರಿಗೆ ಪ್ರತಿ ತಿಂಗಳು ಶೇ. 5 ರಷ್ಟು ಭಾರಿ ಬಡ್ಡಿ ನೀಡುವ ಹಾಗೂ ನಿಶ್ಚಿತ ಆದಾಯ ತಂದುಕೊಡುವ ಗ್ಯಾರಂಟಿ ನೀಡಿ ಈ ಸಂಸ್ಥೆಯು ಸಾರ್ವಜನಿಕರಿಂದ ₹211 ಕೋಟಿಗೂ ಅಧಿಕ ಮೊತ್ತವನ್ನು ಕ್ರೋಢೀಕರಿಸಿತ್ತು. ಇತ್ತೀಚೆಗೆ ಬೆಳಗಾವಿಯಲ್ಲಿ ಸಂಚಲನ ಮೂಡಿಸಿದ್ದ ‘ಶಿವಂ ಅಸೋಸಿಯೇಟ್ಸ್’ ಹಗರಣದ ತನಿಖೆಯ ವೇಳೆ ಈ ಕಂಪನಿಯ ಅಕ್ರಮ ವ್ಯವಹಾರಗಳೂ ಬೆಳಕಿಗೆ ಬಂದಿದ್ದವು. ಈ ಹಿನ್ನೆಲೆಯಲ್ಲಿ ಸಹಕಾರ ಸಂಘಗಳ ಸಹಾಯಕ ನಿಬಂಧಕರಾದ ಜಬೀವುಲ್ಲಾ ಕೆ. ಅವರು ನೀಡಿದ ದೂರಿನನ್ವಯ ಬೆಳಗಾವಿಯ ತಿಲಕವಾಡಿ ಠಾಣೆ ಪೊಲೀಸರು ಕಠಿಣ ಬಡ್ಸ್ ಆಕ್ಟ್ (BUDS Act) ಅಡಿಯಲ್ಲಿ ಕೇಸ್ ದಾಖಲಿಸಿಕೊಂಡಿದ್ದರು.

ದಾಖಲೆಗಳ ಮುಟ್ಟುಗೋಲು ಹಾಗೂ ಬ್ಯಾಂಕ್ ಖಾತೆಗಳ ಜಪ್ತಿ ಪ್ರಕ್ರಿಯೆ ಆರಂಭವಾಗುತ್ತಿದ್ದಂತೆ ಕಂಪನಿಯ ಆಡಳಿತ ಮಂಡಳಿ ತಲೆಮರೆಸಿಕೊಂಡಿತ್ತು. ಸದ್ಯ ಹಗರಣದ ಆಳ-ಅಗಲವನ್ನು ಪರಿಗಣಿಸಿ ರಾಜ್ಯ ಸರ್ಕಾರ ತನಿಖೆಯನ್ನು ಸಿಐಡಿಗೆ (CID) ಹಸ್ತಾಂತರಿಸಿದ್ದು, ಪ್ರಸ್ತುತ ಅಧಿಕಾರಿಗಳು ವಿಚಾರಣೆಯನ್ನು ತೀವ್ರಗೊಳಿಸಿದ್ದಾರೆ.

ಆರೋಪಿ ಪರ ವಕೀಲರ ವಾದವೇನು?

ವಿಶೇಷ ನ್ಯಾಯಾಲಯದಲ್ಲಿ ಆರೋಪಿ ಸಂದೀಪ್ ಪರವಾಗಿ ‘ಮಾತೃ ಲಾ ಫರ್ಮ್’ನ ನ್ಯಾಯವಾದಿಗಳಾದ ಬಿ. ಸಿದ್ದೇಶ್ವರ ಹಾಗೂ ರವಿ ಅವರು ಪ್ರಬಲ ತರ್ಕ ಮಂಡಿಸಿದರು.

“ನಮ್ಮ ಕಕ್ಷಿದಾರರು ಸಂಸ್ಥೆಯ ಕೇವಲ ಒಬ್ಬ ಉದ್ಯೋಗಿಯಾಗಿದ್ದು, ಆರ್ಥಿಕ ಹೂಡಿಕೆ ಅಥವಾ ಹಣಕಾಸು ನಿರ್ಧಾರಗಳ ನಿಯಂತ್ರಣ ಅವರ ಕೈಯಲ್ಲಿರಲಿಲ್ಲ. ಕಳೆದ ಆರು ವರ್ಷಗಳಿಂದ ಸಂಸ್ಥೆಯು ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿದ್ದು, ಹೂಡಿಕೆ ಮಾಡಿದ ಸಾರ್ವಜನಿಕರು ಯಾರೂ ವಂಚನೆಯಾಗಿದೆ ಎಂದು ಪೊಲೀಸ್ ಮೆಟ್ಟಿಲೇರಿಲ್ಲ. ಶಿವಂ ಅಸೋಸಿಯೇಟ್ಸ್ ಪ್ರಕರಣದ ಬಳಿಕ ಕೇವಲ ಇಲಾಖಾ ಅಧಿಕಾರಿಯ ಶಂಕೆಯ ಮೇರೆಗೆ ಈ ದೂರು ದಾಖಲಾಗಿದೆ. ಆರೋಪಿಯು ತನಿಖಾ ಸಂಸ್ಥೆಯ ವಿಚಾರಣೆಗೆ ಸಂಪೂರ್ಣವಾಗಿ ಸಹಕರಿಸಲಿದ್ದಾರೆ” ಎಂದು ನ್ಯಾಯಾಲಯಕ್ಕೆ ಮನವರಿಕೆ ಮಾಡಿಕೊಟ್ಟರು.

ಸರ್ಕಾರಿ ಅಭಿಯೋಜಕರ ಅನುಪಸ್ಥಿತಿಯ ಲಾಭ:

ಸಂಬಂಧಿತ ವಿಶೇಷ ನ್ಯಾಯಾಲಯಕ್ಕೆ ಸರ್ಕಾರದ ಪರವಾಗಿ ವಾದ ಮಂಡಿಸಲು ಅಧಿಕೃತ ಅಭಿಯೋಜಕರು (Government Prosecutor) ನೇಮಕವಾಗದ ಕಾರಣ, ಈ ಜಾಮೀನು ಅರ್ಜಿಗೆ ಸರ್ಕಾರದ ಕಡೆಯಿಂದ ಯಾವುದೇ ಆಕ್ಷೇಪಣೆ ಸಲ್ಲಿಕೆಯಾಗಲಿಲ್ಲ. ಪ್ರತಿವಾದದ ಕೊರತೆ ಹಾಗೂ ರಕ್ಷಣಾ ವಕೀಲರ ವಾದಾಂಶಗಳನ್ನು ಪುರಸ್ಕರಿಸಿದ ನ್ಯಾಯಾಧೀಶರಾದ ನ್ಯಾ. ಬಾಲಚಂದ್ರ ಅವರು, ಅರ್ಜಿದಾರರಿಗೆ ಷರತ್ತುಬದ್ಧ ಮಧ್ಯಂತರ ನಿರೀಕ್ಷಣಾ ಜಾಮೀನು ನೀಡಿ ಆದೇಶ ಪ್ರಕಟಿಸಿದರು.