ನವದೆಹಲಿ: ಪ್ಯಾರಿಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದಿರುವ ಭಾರತೀಯ ಬ್ಯಾಡ್ಮಿಂಟನ್ ತಾರೆ ಪಿ.ವಿ. ಸಿಂಧು ತಮ್ಮ ಸಾಧನೆಯ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ. ಚಿನ್ನದ ಪದಕ ಗೆಲ್ಲುವ ಗುರಿ ಹೊಂದಿದ್ದರೂ, ಹಲವು ವರ್ಷಗಳ ಕಠಿಣ ಪರಿಶ್ರಮ ಮತ್ತು ದೃಢನಿಶ್ಚಯಕ್ಕೆ ಈ ಸಾಧನೆ ಸಾಕ್ಷಿಯಾಗಿದೆ ಎಂದು ಹೇಳಿದ್ದಾರೆ.
“ನನಗೆ ಖಂಡಿತವಾಗಿಯೂ ಚಿನ್ನದ ಪದಕ ಬೇಕಿತ್ತು. ಆದರೆ, ಸುದೀರ್ಘ ಪರಿಶ್ರಮ, ನೋವಿನ ಸೋಲುಗಳು ಮತ್ತು ಲೆಕ್ಕವಿಲ್ಲದಷ್ಟು ಗಂಟೆಗಳ ಅಭ್ಯಾಸಕ್ಕೆ ಈಗ ಸಾರ್ಥಕತೆ ಸಿಕ್ಕಿದೆ ಎಂಬ ಭಾವನೆ ಅಪಾರ ಸಂತಸ ನೀಡಿದೆ” ಎಂದು ಸಿಂಧು ತಿಳಿಸಿದ್ದಾರೆ.
ದಕ್ಷಿಣ ಕೊರಿಯಾದ ಬ್ಯಾಡ್ಮಿಂಟನ್ ತಾರೆ ಆನ್ ಸೆ-ಯಾಂಗ್ ಅವರನ್ನು ಶ್ಲಾಘಿಸಿದ ಸಿಂಧು, ಅವರು ಕ್ರೀಡೆಯ ಮಟ್ಟವನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ಯುತ್ತಿದ್ದಾರೆ ಎಂದಿದ್ದಾರೆ. ಅವರೊಂದಿಗೆ ಅಂಕಣ ಹಂಚಿಕೊಳ್ಳುವುದು ಗೌರವದ ಸಂಗತಿ ಎಂದು ಬಣ್ಣಿಸಿದ್ದಾರೆ.
ಕಠಿಣ ಸಂದರ್ಭಗಳಲ್ಲಿ, ತಮ್ಮ ಮೇಲಿನ ನಂಬಿಕೆಯನ್ನೇ ಕಳೆದುಕೊಂಡಾಗಲೂ ಬೆಂಬಲವಾಗಿ ನಿಂತಿದ್ದ ತಂಡದ ಸದಸ್ಯರಿಗೆ ಸಿಂಧು ಕೃತಜ್ಞತೆ ಸಲ್ಲಿಸಿದ್ದಾರೆ. “ನಮ್ಮ ಮುಂದೆ ಇನ್ನೂ ಸಾಧಿಸಬೇಕಾದ ಗುರಿಗಳು ಸಾಕಷ್ಟಿವೆ” ಎಂದು ಹೇಳುವ ಮೂಲಕ ಭವಿಷ್ಯದಲ್ಲಿ ಮತ್ತಷ್ಟು ಸಾಧನೆ ಮಾಡುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
