ಶಿವಮೊಗ್ಗ: ವಿಘ್ನನಿವಾರಕ ಗಣೇಶನ ವಾಹನವಾದ ಮೂಷಿಕಗಳೇ ದೇವಸ್ಥಾನದ ಹುಂಡಿ ಹಣವನ್ನು ಚಿಂದಿ ಮಾಡಿರುವ ವಿಚಿತ್ರ ಹಾಗೂ ಅಚ್ಚರಿಯ ವಿದ್ಯಮಾನವೊಂದು ನಗರದಲ್ಲಿ ತಡವಾಗಿ ಬೆಳಕಿಗೆ ಬಂದಿದೆ. ಭಕ್ತರು ಶ್ರದ್ಧಾ-ಭಕ್ತಿಯಿಂದ ಸಮರ್ಪಿಸಿದ್ದ ಸಾವಿರಾರು ರೂಪಾಯಿ ನಗದು ಹಣವನ್ನು ಇಲಿಗಳು ಕಡಿದು ಸಂಪೂರ್ಣವಾಗಿ ಹಾಳುಗೆಡವಿವೆ.
ನಗರದ ಶಾಂತಿನಗರದ ಬಂಗಾರಪ್ಪ ಬಡಾವಣೆಯಲ್ಲಿ ಪ್ರತಿಷ್ಠಾಪಿತವಾಗಿರುವ ಶ್ರೀ ವಿಜಯ ಗಣಪತಿ ಸನ್ನಿಧಿಯಲ್ಲಿ ಈ ಅನಿರೀಕ್ಷಿತ ಪ್ರಸಂಗ ನಡೆದಿದೆ.
ಎಣಿಕೆ ವೇಳೆ ಸಿಬ್ಬಂದಿಗೆ ಕಾದಿತ್ತು ಶಾಕ್
ದೇವಸ್ಥಾನದ ಕಾಣಿಕೆ ಪೆಟ್ಟಿಗೆಯನ್ನು ನಿಯಮಾನುಸಾರ ತೆರೆದು ಒಳಗಿದ್ದ ಹಣವನ್ನು ಲೆಕ್ಕ ಹಾಕಲು ಆಡಳಿತ ಮಂಡಳಿಯ ಪದಾಧಿಕಾರಿಗಳು ಮುಂದಾದಾಗ ಈ ಕೃತ್ಯ ಬಯಲಾಗಿದೆ. ಹುಂಡಿಯಲ್ಲಿದ್ದ ನೋಟುಗಳ ಪೈಕಿ ಬಹುಪಾಲು ಹಣವನ್ನು ಇಲಿಗಳು ಹಲ್ಲುಗಳಿಂದ ಕಚ್ಚಿ ಪುಡಿಪುಡಿ ಮಾಡಿದ್ದವು. ₹100, ₹50, ₹20 ಹಾಗೂ ₹10 ಮುಖಬೆಲೆಯ ನೋಟುಗಳು ಕಾಗದದ ಚೂರುಗಳಂತಾಗಿದ್ದು, ಹುಂಡಿಯೊಳಗೆ ಕೇವಲ ನುಚ್ಚುನೂರಾದ ಕಾಗದದ ರಾಶಿಯಷ್ಟೇ ಕಂಡುಬಂದಿದೆ.
ಸಾವಿರಾರು ರೂಪಾಯಿ ನಷ್ಟ
ಕಾಣಿಕೆ ಪೆಟ್ಟಿಗೆಗೆ ಹಣ ಹಾಕಲು ಇರುವ ಸಣ್ಣ ರಂಧ್ರದ ಮೂಲಕ ಒಳನುಗ್ಗಿರುವ ಇಲಿಗಳು ಇಷ್ಟೊಂದು ಪ್ರಮಾಣದ ಅನಾಹುತ ಸೃಷ್ಟಿಸಿವೆ. ಇದರಿಂದಾಗಿ ಅಂದಾಜು ₹5,000 ದಿಂದ ₹6,000 ವರೆಗಿನ ಹಣ ಸಂಪೂರ್ಣವಾಗಿ ನಾಶವಾಗಿದೆ ಎಂದು ಸಮಿತಿಯ ಸದಸ್ಯರು ತಿಳಿಸಿದ್ದಾರೆ. ಇಷ್ಟೊಂದು ಹಣ ನಿರುಪಯುಕ್ತವಾಗಿರುವುದನ್ನು ಕಂಡು ಸ್ಥಳೀಯ ಸಾರ್ವಜನಿಕರು ಹಾಗೂ ಆಡಳಿತ ವರ್ಗ ತೀವ್ರ ಬೇಸರ ವ್ಯಕ್ತಪಡಿಸಿದೆ.
ಸದ್ಯ ಜಖಂಗೊಂಡಿರುವ ನೋಟುಗಳನ್ನು ಎಚ್ಚರಿಕೆಯಿಂದ ಸಂಗ್ರಹಿಸಿರುವ ದೇವಸ್ಥಾನದ ಆಡಳಿತ ಮಂಡಳಿಯು, ಬ್ಯಾಂಕಿಂಗ್ ನಿಯಮಗಳ ಅಡಿಯಲ್ಲಿ ಇವುಗಳನ್ನು ಬ್ಯಾಂಕ್ಗೆ ಒಪ್ಪಿಸಿ ಬದಲಾವಣೆ ಮಾಡಿಕೊಳ್ಳಲು ಸಾಧ್ಯವಿದೆಯೇ ಎಂಬ ಬಗ್ಗೆ ಕಾನೂನಾತ್ಮಕ ಪರಿಶೀಲನೆ ನಡೆಸುತ್ತಿದೆ.
