ಮೈಸೂರು: ವಿಶ್ವಪ್ರಸಿದ್ಧ ಮೈಸೂರು ದಸರಾ(Mysuru Dasara) ಮಹೋತ್ಸವದ ಪ್ರಮುಖ ಆಕರ್ಷಣೆಯಾದ ವಿಜಯದಶಮಿಯ ಜಂಬೂಸವಾರಿಯಲ್ಲಿ ಈ ಬಾರಿ ಚಾಮುಂಡೇಶ್ವರಿಯ ಚಿನ್ನದ ಅಂಬಾರಿಯನ್ನು ಯಾರು ಹೊರಲಿದ್ದಾರೆ ಎಂಬ ಕೌತುಕಕ್ಕೆ ಅಧಿಕೃತ ತೆರೆಬಿದ್ದಿದೆ. ಗಜಪಡೆಯ ಅತ್ಯಂತ ಶಾಂತ ಹಾಗೂ ಗಂಭೀರ ನಡಿಗೆಯ 54 ವರ್ಷದ ಆನೆ ‘ಪ್ರಶಾಂತ’ (Elephant Prashantha) ಈ ಬಾರಿಯ ಮೈಸೂರು ದಸರಾ(Mysuru Dasara) ಜಂಬೂಸವಾರಿಯಲ್ಲಿ ರಾಜಬೀದಿಯಲ್ಲಿ ಅಂಬಾರಿ ಹೊತ್ತು ಗಜಪಡೆಯನ್ನು ಮುನ್ನಡೆಸಲಿದ್ದಾನೆ ಎಂದು ಸಚಿವ ಡಾ. ಯತೀಂದ್ರ ಅಧಿಕೃತವಾಗಿ ತಿಳಿಸಿದ್ದಾರೆ.
ಕ್ಯಾಪ್ಟನ್ ಅಭಿಮನ್ಯು ನಿವೃತ್ತಿ: ತೆರೆಮರೆಯಲ್ಲಿದ್ದ ಪೈಪೋಟಿ
ದೀರ್ಘಕಾಲದವರೆಗೆ ಚಿನ್ನದ ಅಂಬಾರಿಯನ್ನು ಯಶಸ್ವಿಯಾಗಿ ಹೊತ್ತು ಲಕ್ಷಾಂತರ ಭಕ್ತರ ಕಣ್ಮನ ಸೆಳೆದಿದ್ದ ಗಜಪಡೆಯ ನಾಯಕ ‘ಅಭಿಮನ್ಯು’ ಇತ್ತೀಚೆಗಷ್ಟೇ ತನ್ನ ಜವಾಬ್ದಾರಿಯಿಂದ ನಿವೃತ್ತಿ ಹೊಂದಿದ್ದ. ಈ ಹಿನ್ನೆಲೆಯಲ್ಲಿ ನೂತನ ಕ್ಯಾಪ್ಟನ್ ಪಟ್ಟಕ್ಕಾಗಿ ಗಜಪಡೆಯ ಪ್ರಮುಖ ಆನೆಗಳಾದ ಧನಂಜಯ, ಪ್ರಶಾಂತ, ಏಕಲವ್ಯ, ಮಹೇಂದ್ರ ಹಾಗೂ ಸುಗ್ರೀವ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿತ್ತು.
ತಾಲೀಮಿನಲ್ಲಿ ಮಹೇಂದ್ರ ವೈಫಲ್ಯ: ಪ್ರಶಾಂತನಿಗೆ ಒಲಿದ ಗೌರವ
ಅಂಬಾರಿ ಹೊರುವ ರೇಸ್‌ನಲ್ಲಿ ಮುಂಚೂಣಿಯಲ್ಲಿದ್ದ ‘ಮಹೇಂದ್ರ’ ಆನೆಗೆ ತೂಕ ಹೊರುವ ತಾಲೀಮು ನೀಡಲಾಗಿತ್ತು. ಆದರೆ, ಮರದ ಅಂಬಾರಿ ಹೊತ್ತು ಸಾಗುವ ಪೂರ್ವಾಭ್ಯಾಸದ ವೇಳೆ ಮಹೇಂದ್ರ ಮಾರ್ಗಮಧ್ಯದಲ್ಲೇ ಸುಸ್ತಾಗಿ ನಿಂತುಬಿಟ್ಟಿದ್ದ. ಇದರಿಂದಾಗಿ ಭದ್ರತೆ ಹಾಗೂ ಸಾಮರ್ಥ್ಯದ ದೃಷ್ಟಿಯಿಂದ ಮಹೇಂದ್ರನನ್ನು ಅಂತಿಮ ರೇಸ್‌ನಿಂದ ಕೈಬಿಡಲಾಯಿತು. ಬಳಿಕ ದೈಹಿಕ ಸಾಮರ್ಥ್ಯ, ಶಾಂತಚಿತ್ತತೆ ಹಾಗೂ ಕಠಿಣ ತಾಲೀಮಿನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ‘ಪ್ರಶಾಂತ’ನಿಗೆ ಅಂತಿಮವಾಗಿ 750 ಕೆಜಿ ತೂಕದ ಚಿನ್ನದ ಅಂಬಾರಿ ಹೊರುವ ಪವಿತ್ರ ಹೊಣೆಗಾರಿಕೆ ವಹಿಸಲಾಗಿದೆ.
ರಾಜವೈಭವದ ಜಂಬೂಸವಾರಿಯಲ್ಲಿ ತಾಯಿ ಚಾಮುಂಡೇಶ್ವರಿಯ ಉತ್ಸವ ಮೂರ್ತಿಯನ್ನು ಹೊತ್ತು ಗಾಂಭೀರ್ಯದಿಂದ ಹೆಜ್ಜೆ ಹಾಕಲಿರುವ ಪ್ರಶಾಂತನ ದರ್ಶನ ಪಡೆಯಲು ನಾಡಿನ ಜನತೆ ಕಾತರದಿಂದ ಕಾಯುತ್ತಿದ್ದಾರೆ.
