ಪಂಚಕುಲ: ಪ್ರಜಾಪ್ರಭುತ್ವವನ್ನು ಬಲಪಡಿಸಲು ಮತ್ತು ಆಡಳಿತವನ್ನು ಸುಧಾರಿಸಲು ಭಿನ್ನಾಭಿಪ್ರಾಯಗಳು ಅತ್ಯಗತ್ಯ ಎಂದು ಪ್ರತಿಪಾದಿಸಿರುವ ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರು, ಜನಪ್ರತಿನಿಧಿಗಳು ಇಂತಹ ಭಿನ್ನಾಭಿಪ್ರಾಯಗಳನ್ನು ಗೌರವಿಸಬೇಕೆಂದು ಸೋಮವಾರ ಕರೆ ನೀಡಿದರು.
‘ಸಂವಿಧಾನ ಪಕ್ವಾಡ’ (ಸಂವಿಧಾನ ಪಾಕ್ಷಿಕ) ಕಾರ್ಯಕ್ರಮದ ಅಂಗವಾಗಿ ಹರಿಯಾಣ ವಿಧಾನಸಭೆಯು ಪಂಚಕುಲದಲ್ಲಿ ಆಯೋಜಿಸಿದ್ದ ‘ಜನಪ್ರತಿನಿಧಿ ಸಮ್ಮೇಳನ’ದಲ್ಲಿ ಮಾತನಾಡಿದ ಬಿರ್ಲಾ, ಆರೋಗ್ಯಕರ ಪ್ರಜಾಪ್ರಭುತ್ವದಲ್ಲಿ ಒಪ್ಪಿಗೆ ಮತ್ತು ಭಿನ್ನಾಭಿಪ್ರಾಯಗಳೆರಡೂ ಅವಿಭಾಜ್ಯ ಅಂಗಗಳಾಗಿವೆ ಎಂದು ಹೇಳಿದರು. ಭಿನ್ನಾಭಿಪ್ರಾಯಗಳು ಹೊಸ ದೃಷ್ಟಿಕೋನಗಳನ್ನು ತರುತ್ತವೆ, ಆಡಳಿತಾತ್ಮಕ ಲೋಪಗಳನ್ನು ಹೊರಗೆ ತರುತ್ತವೆ ಮತ್ತು ಆಡಳಿತವನ್ನು ಸುಧಾರಿಸಲು ಸಹಾಯ ಮಾಡುತ್ತವೆ ಎಂದು ಅವರು ತಿಳಿಸಿದರು.
ರಾಜಕೀಯ ಮತ್ತು ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳನ್ನು ಮೀರಿ, ರಾಜ್ಯ ಹಾಗೂ ದೇಶದ ಅಭಿವೃದ್ಧಿಯತ್ತ, ವಿಶೇಷವಾಗಿ ಸಮಾಜದ ಅತ್ಯಂತ ದುರ್ಬಲ ವರ್ಗಗಳ ಕಲ್ಯಾಣದತ್ತ ಗಮನಹರಿಸುವಂತೆ ಅವರು ಚುನಾಯಿತ ಪ್ರತಿನಿಧಿಗಳಿಗೆ ಕರೆ ನೀಡಿದರು.
ಹರಿಯಾಣದ ಆರು ದಶಕಗಳ ಪಯಣವನ್ನು ಉಲ್ಲೇಖಿಸಿದ ಬಿರ್ಲಾ, ಕೃಷಿ, ರಾಷ್ಟ್ರೀಯ ಭದ್ರತೆ ಮತ್ತು ಕ್ರೀಡಾ ಕ್ಷೇತ್ರಗಳಿಗೆ ಆ ರಾಜ್ಯ ನೀಡಿರುವ ಕೊಡುಗೆಗಳನ್ನು ಶ್ಲಾಘಿಸಿದರು. ರಾಜ್ಯದ ಈ ಪ್ರಗತಿಯು ಭಾರತದ ಪ್ರಜಾಪ್ರಭುತ್ವದ ದೃಢತೆಯ ಪ್ರತಿಬಿಂಬವಾಗಿದೆ ಎಂದು ಅವರು ಬಣ್ಣಿಸಿದರು.
ಸಂವಿಧಾನವನ್ನು ಕೇವಲ ಆಡಳಿತ ನಡೆಸುವ ಚೌಕಟ್ಟು ಎಂದು ಮಾತ್ರ ನೋಡದೆ, ಅದು ದೇಶದ ‘ಜೀವಂತ ಆತ್ಮ’ ಮತ್ತು ‘ನೈತಿಕ ದಿಕ್ಸೂಚಿ’ಯಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಈ ಸಂದರ್ಭದಲ್ಲಿ ಹರಿಯಾಣ ಮುಖ್ಯಮಂತ್ರಿ ನಯಾಬ್ ಸಿಂಗ್ ಸೈನಿ, ವಿಧಾನಸಭಾ ಸ್ಪೀಕರ್ ಹರ್ವಿಂದರ್ ಕಲ್ಯಾಣ್ ಮತ್ತು ವಿರೋಧ ಪಕ್ಷದ ನಾಯಕ ಭೂಪಿಂದರ್ ಸಿಂಗ್ ಹೂಡಾ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.
