ನವದೆಹಲಿ: ಹಲವು ತಿಂಗಳುಗಳ ಕಾನೂನು ಮತ್ತು ತಾಂತ್ರಿಕ ಅಡೆತಡೆಗಳ ಬಳಿಕ ಡಿಜಿಟಲ್ ಪಾವತಿ ವೇದಿಕೆ ಪೇಟಿಎಂಗೆ(Paytm) ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಶುಕ್ರವಾರ ದೊಡ್ಡ ನಿರಾಳತೆ ನೀಡಿದೆ. ಪೇಟಿಎಂ ಮಾತೃಸಂಸ್ಥೆ ‘ಒನ್ 97 ಕಮ್ಯುನಿಕೇಷನ್ಸ್’ ಅಡಿಯ ‘ಪೇಟಿಎಂ(Paytm) ಪೇಮೆಂಟ್ಸ್ ಸರ್ವೀಸಸ್ ಲಿಮಿಟೆಡ್’ (PPSL) ಮೂಲಕ ಪ್ರಿಪೇಯ್ಡ್ ಪಾವತಿ ಸಾಧನಗಳನ್ನು (PPI) ಅಥವಾ ಡಿಜಿಟಲ್ ವ್ಯಾಲೆಟ್ ಸೇವೆಯನ್ನು ನಿರ್ವಹಿಸಲು ಕೇಂದ್ರೀಯ ಬ್ಯಾಂಕ್ ತಾತ್ವಿಕ ಅನುಮೋದನೆ (In-principle approval) ನೀಡಿದೆ. ಇದರಿಂದಾಗಿ ಸ್ಥಗಿತಗೊಂಡಿದ್ದ ಪೇಟಿಎಂ ಪ್ರಿಪೇಯ್ಡ್ ವ್ಯಾಲೆಟ್ ಸೇವೆ(Paytm prepaid wallet) ಮತ್ತೆ ಗ್ರಾಹಕರ ಕೈಸೇರುವ ಹಾದಿ ಸುಗಮವಾಗಿದೆ.
ಅಂತಿಮ ಅನುಮತಿಗೆ ಆರು ತಿಂಗಳ ಗಡುವು
2007ರ ಪಾವತಿ ಮತ್ತು ಇತ್ಯರ್ಥ ವ್ಯವಸ್ಥೆಗಳ ಕಾಯ್ದೆಯಡಿ ಆರ್‌ಬಿಐ ಈ ಸಮ್ಮತಿ ಸೂಚಿಸಿದೆ. ಆದರೆ, ತಾತ್ವಿಕ ಒಪ್ಪಿಗೆ ಸಿಕ್ಕ ತಕ್ಷಣವೇ ವ್ಯಾಲೆಟ್ ಸೇವೆ ಶುರುವಾಗುವುದಿಲ್ಲ. ಆರ್‌ಬಿಐ ಮಾರ್ಗಸೂಚಿಗಳ ಪ್ರಕಾರ, ಪಿಪಿಎಸ್‌ಎಲ್ ಸಂಸ್ಥೆಯು ಮುಂದಿನ ಆರು ತಿಂಗಳೊಳಗೆ ಸಂಪೂರ್ಣ ಸಿಸ್ಟಮ್ ಹಾಗೂ ಸೈಬರ್ ಭದ್ರತಾ ಆಡಿಟ್ ನಡೆಸಿ ವರದಿ ಸಲ್ಲಿಸಬೇಕಿದೆ. ಈ ವರದಿಯನ್ನು ಪರಿಶೀಲಿಸಿ ಆರ್‌ಬಿಐ ಅಂತಿಮ ಪ್ರಮಾಣಪತ್ರ ನೀಡಿದ ನಂತರವಷ್ಟೇ ಸಾರ್ವಜನಿಕರಿಗೆ ವ್ಯಾಲೆಟ್ ಸೇವೆ ಅಧಿಕೃತವಾಗಿ ಲಭ್ಯವಾಗಲಿದೆ ಎಂದು ಕಂಪನಿ ಸ್ಪಷ್ಟಪಡಿಸಿದೆ.
ಹಿನ್ನಡೆ ಮತ್ತು ಪುನರಾಗಮನದ ಹಾದಿ
ಈ ಮೊದಲು ‘ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್’ (PPBL) ಅಡಿಯಲ್ಲಿ ವ್ಯಾಲೆಟ್ ಸೇವೆ ನಡೆಯುತ್ತಿತ್ತು. ನಿಯಮಾವಳಿಗಳ ಉಲ್ಲಂಘನೆಯ ಕಾರಣ ನೀಡಿ 2024ರ ಆರಂಭದಲ್ಲಿ ಆರ್‌ಬಿಐ ಈ ಬ್ಯಾಂಕ್ ವಹಿವಾಟಿಗೆ ನಿರ್ಬಂಧ ಹೇರಿತ್ತು. ಮುಂದುವರಿದು, 2026ರ ಏಪ್ರಿಲ್‌ನಲ್ಲಿ ಬ್ಯಾಂಕಿಂಗ್ ಪರವಾನಗಿಯನ್ನೇ ರದ್ದುಗೊಳಿಸಿದ್ದರಿಂದ ವ್ಯಾಲೆಟ್ ಸೇವೆಗೆ ಭಾರಿ ಹೊಡೆತ ಬಿದ್ದಿತ್ತು. ಈ ಹಿನ್ನೆಲೆಯಲ್ಲಿ ಪೇಟಿಎಂ ಸಂಸ್ಥೆಯು ಪೇಮೆಂಟ್ಸ್ ಬ್ಯಾಂಕ್ ಬದಲಿಗೆ ಪ್ರತ್ಯೇಕ ಅಂಗಸಂಸ್ಥೆಯಾದ ಪಿಪಿಎಸ್‌ಎಲ್ ಮೂಲಕ ವ್ಯಾಲೆಟ್ ನಿರ್ವಹಿಸಲು ಅನುಮತಿ ಕೋರಿತ್ತು.
ಹೂಡಿಕೆದಾರರಲ್ಲಿ ಹೊಸ ಉತ್ಸಾಹ
ಆರ್‌ಬಿಐನ ಈ ನಿರ್ಧಾರವು ಪೇಟಿಎಂ ಕಂಪನಿಯ ಭವಿಷ್ಯಕ್ಕೆ ಹೊಸ ಚೈತನ್ಯ ನೀಡಿದೆ. ಪ್ರಿಪೇಯ್ಡ್ ವ್ಯಾಲೆಟ್ ಸೇವೆ ಮರಳುವ ಸುದ್ದಿ ಪ್ರಕಟವಾಗುತ್ತಿದ್ದಂತೆಯೇ, ಶುಕ್ರವಾರದ ವಹಿವಾಟಿನಲ್ಲಿ ಪೇಟಿಎಂ ಷೇರುಗಳು ಭಾರಿ ಬೇಡಿಕೆ ಪಡೆದುಕೊಂಡಿದ್ದು, ಕಳೆದ ಒಂದು ವರ್ಷದಲ್ಲೇ ಗರಿಷ್ಠ ಮಟ್ಟಕ್ಕೆ ಜಿಗಿದಿವೆ.
